Hindi ako Fear Factor material

Naalala ko nung kasagsagan ng audition para sa pinoy fear factor, niyaya ako ni Kuya Dante (kasamahan ko dati sa trabaho) mag audition. Sa dinami dami naman ng tao, ako pa ang niyaya. Eh napakalaki kong lampa. Katawan ko nga di ko mabuhat eh. Palibahasa siya batak ang katawan, siguradong kakayanin niya yung mga stunts. Eh ako? Puro hangin at taba lang ata ang laman ng katawan ko. Syet. Tapos on national tv pa. No way man!

Di ako papasa dun panigurado ko. Unang una, takot ako sa heights. Madali akong malula. Naalala ko nung grade six ako pinilit akong sumakay ng Anchors away sa Enchanted. Nasa dulo pa ako. Tangina talaga yung ride na yun. Akala ko katapusan ko na.

Takot din akong malunod. Dahil hindi ako marunong lumangoy. Kahit langoy aso. Pagtawanan niyo na ako pero hindi talaga. Madalas naman kaming magbeach dati pero ewan ko ba kung bakit hindi ako natuto. Puro lamon kasi inaatupag.

Heights + tubig. Leche first stunt pa lang tanggal na ko.

Pero matibay tibay naman ang sikmura ko kahit paano. Kakayanin ko sigurong kainin kung ano man ang ihain nila. Wag lang dumi o lupa, kalokohan na yun. Actually lately lang ako natuto kumain ng sisiw sa balut. Noong bata ako, lahat ng parte kaya kong kainin maliban sa sisiw. Pakiramdam ko nakatingin sakin yung sisiw with matching tuka at balahibo na para bang nagmamakaawa na huwag siyang kainin. Pero ngayon, wala na kong pakialam. Laman tiyan din yun. Pampatigas pa.

Ng tuhod ungas.

Marami pa kong kinatatakutan. Takot ako sa multo. Ayoko rin sa mga masisikip na lugar, sa mabaho, sa putik. Sa mataong lugar, nakaka overwhelm. Sa simbahan lagi akong nasa likuran. Takot din akong magsalita sa harap ng maraming tao. Yung lahat ng mata nakatitig sa yo.

Takot akong matulog mag isa. Kailangan nakabukas mga ilaw.

Takot din ako sa mascot. Mali, si sherwin pala yun.

Takot ako sa rejection.

Takot akong pumalpak. Magkamali.

Takot akong maiwan sa ere. Gets mo?

At higit sa lahat.

Takot akong mamatay.

—-

Isinulat pagkatapos mapanuod yung stunt na tangkeng punong puno ng mga ahas. Gustong gusto nung mga ahas yung dibdib ni Savanah pansin nyo? Sayang di kinagat. Hehe. Perv.